Söngvakeppnin fer fram í Gufunesi á næsta ári
Setja bókamerki
Söngvakeppni Ríkisútvarpsins verður haldin í kvikmyndaveri RVK Studios í Gufunesi á næsta ári. Undanfarin ár hafa undanúrslit Söngvakeppninnar farið fram í Háskólabíói og úrslitin svo ráðist í Laugardalshöll. Ríkisútvarpið greinir frá þessu.
Í Söngvakeppninni verður framlag Íslands í Eurovision-söngvakeppninni valið. Eurovision fer fram í Tórínó á Ítalíu í maí á næsta ári.
Að því er fram kemur í frétt Ríkisútvarpsins verður kvikmyndaverinu breytt í Söngvakeppnishöll og keppt verður þrjá laugardaga í febrúar og mars. Undanúrslitakeppnirnar verða 19. og 26. febrúar og úrslitin ráðast 5. mars.
158 lög send inn í keppnina
Alls verða tíu lög valin úr 158 lögum sem hafa verið send inn í keppnina. Ráðgefandi valnefnd, skipuð fulltrúum frá FÍH, FTT og Ríkisútvarpinu, hlustaði á öll lögin og skilaði framkvæmdastjórn keppninnar áliti sínu. Framkvæmdastjórnin hefur valið 10 lög til keppni. Af þeim voru fimm valin úr innsendum lögum og sem fyrr var leitað sérstaklega til valinkunnra og reyndra höfunda með hin lögin fimm.
Lögin tíu verða frumflutt í janúar og kynnt í sjónvarpþætti á Ríkisútvarpinu 29. janúar og gerð aðgengileg á helstu streymisveitum.
Hætta vegna jarðfalls í sprungur metin töluverð
Búið að fella björninn
„Hví erum við dýrasta land í heimi?“
Of margir nemendur og ákall um hæft starfsfólk
Algeng laun 1,4 til 2,2 milljónir
Eina leiðin var að fella björninn