Sjana Rut Jóhannsdóttir var að gefa út lagið Bitter Sweet Sound, sem og tónlistarmyndband við það. Lagið og textann samdi hún sjálf. Við tökur á myndbandinu naut hún aðstoðar Snorra Christopherssonar en hún klippti og leikstýrði því sjálf.
„Lagið fjallar í stuttu máli um ástarsorg. Það er svolítið síðan ég samdi þetta lag, um áramótin. Ég er að tjá mig um hvernig mér leið á þeim tíma.“
Svana vakti mikla athygli í sjónvarpsþáttunum The Voice Ísland þar sem henni var hrósað í hástert fyrir sérstaka og hljómfagra rödd. „Sjana, þú ert náttúrulega 17 ára og það er eins og það sé einhver 50 ára gömul gospelsöngkona inni í þér, hvaðan kemur þetta?“ Sagði Svala Björgvins, þjálfari hennar í þáttunum.
Sjana hefur ekki setið auðum höndum eftir að The Voice Ísland lauk. Hún hefur samið mikið af tónlist og gefið út nokkur lög, þótt þetta sé fyrsta tónlistarmyndbandið úr hennar smiðju. Hún hefur einnig verið að koma fram ásamt bróður sínum Alex Má Jóhannssyni og saman tóku þau systkinin þátt í Músíktilraunum.
„Við reynum að taka þátt í öllu og koma okkur fram alls staðar. Það gerist ekkert nema maður geri það sjálfur.“