Ungstirnið Justin Bieber fór huldu höfði í Amsterdam á föstudaginn, eða svona hér um bil, en hann sást skarta hárkollu, sólgleraugum og sérkennilegu yfirvaraskeggi þar sem hann rölti um götur borgarinnar.

Bieber hefur greint frá því að honum líði stundum eins og dýri í búri sökum frægðar sinnar, enda er hann hundeltur af aðdáendum hvert sem hann fer. Þá getur verið freistandi að skella á sig hárkollu og gerviskeggi.

Gervið virkaði þó ekki sem skyldi, heldur dró bara frekari athygli að kappanum líkt og fram kemur í frétt Daily Mail.

Ekki er ljóst hvort Bieber hafi í raun talið sig geta villt um fyrir aðdáendum sínum, eða hvort hann sé bara spenntur fyrir hrekkjavökunni sem haldin verður í lok mánaðar.

Bieber tókst ekki að afvegaleiða aðdáendur sína með gervinu. Ljósmynd / skjáskot Daily Mail