Hjónin Chang Wan-ji og Hsu Sho-er reka fatahreinsunina Wansho Laundry í Taichung, Taiwan. Undanfarna mánuði hefur verið lítið að gera hjá þeim sökum strangra útgöngureglna í landinu vegna Covid-19. Barnabarn þeirra vildi hressa þau við og fékk þá skemmtilegu hugmynd að fá þau til þess að klæða sig upp í föt sem aldrei voru sótt og taka myndir af þeim. Hann ákvað í kjölfarið að búa til instagram reikning fyrir þau saman og birta myndirnar þar inn á.

Áður en þau vissu af hafði instagramsíða þeirra slegið í gegn, með 444 þúsund fylgjendur sem fer fjölgandi með hverjum degi. Undir myndirnar skrifa þau meðal annars að það veiti þeim gleði að fara í nýjan karakter og klæða sig upp.

Þau segja að aldur eigi ekki að takmarka það hverju þú vilt klæðast og auðvelt sé að finna til gömul föt og gera þau að flottum og smart „outfitum”.

Einnig minna þau fólk vinalega á að gleyma ekki að sækja fötin sín í hreinsun, en fötin sem þau klæða sig upp í hafa ekki verið sótt í mörg ár.

Virkilega hressandi og skemmtileg leið til að gera sér glaðan dag! Tíska getur svo sannarlega veitt gleði.

Æðibit­inn DJ Dóra Júlía finn­ur ljósa punkt­inn í til­ver­unni og flyt­ur góðar frétt­ir reglu­lega yfir dag­inn í út­varp­inu og á vefn­um í sam­starfi við Æðibita.