Þetta er ekki síðbúið aprílgabb því Nói Síríus hefur ákveðið að blása til lagersölu á óseldum páskaeggjum í vikunni.

Auðjón Guðmundsson, framkvæmdastjóri markaðs- og sölusviðs Nóa Síríus, segir að lagersalan sé liður í viðleitni fyrirtækisins til þess að sýna ábyrgð og sporna við matarsóun.

„Við höfum lengi unnið markvisst að því að reyna að sporna við sóun, til dæmis með því að nýta súkkulaðið úr afgangseggjum í aðrar vörur, auk þess sem talsvert hefur verið gefið til góðgerðarmála. Undanfarin ár hafa neytendur í auknum mæli óskað eftir því að fá að kaupa umfram egg á afslætti eftir páskahátíðina.

Eftir smá yfirlegu ákváðum við að bregðast við þessari miklu eftirspurn með lagersölu sem mun fara fram næstkomandi fimmtudag,“ segir Auðjón og bætir við að starfsfólk Nóa Síríus hlakki til að taka á móti spenntum viðskiptavinum.

Lagersalan fer fram á lager Nóa Síríus, Hesthálsi 2-4, á fimmtudag milli klukkan 16 og 18.

Fyrstir koma, fyrstir fá og því gæti borgað sig að mæta tímanlega. Fyrirkomulagið er þannig að fólk kaupir poka við inngang fyrir 2.000 kr. og má fylla hann með eins mörgum eggjum og komast í hann. Einnig er rétt að taka fram að eingöngu er hægt að greiða með korti.