Litlar breytingar eru á virkni eldgossins við Sundhnúkagíga frá því í gær að sögn náttúruvársérfræðings. Hraun rennur norðan og austan varnargarðanna.

„Út frá því sem við sjáum á vefmyndavélum virðist krafturinn vera mjög svipaður,“ segir Einar Bessi Gestsson, náttúruvársérfræðingur á Veðurstofu Íslands.

„Það eru tveir gígar sem eru stærstir og svo eru nokkrir minni gígar.“

Frétt af mbl.is

Erfitt að spá um framhaldið en telur líklegra að gosið fjari hægt og rólega út

Hvað gasmengun varðar er norðan og norðaustanátt nú í morgunsárið. Þá berst gasmengun til suðurs og suðvesturs og gæti farið yfir Grindavík fyrri hluta dags, að sögn Einars.

Í kvöld snýst vindáttin og verður austlægari. Þá gæti gasmengun farið yfir Svartsengi og Reykjanesbæ.