Bandaríska leikkonan Anne Hathaway upplifði fósturlát þegar hún gekk með sitt fyrsta barn árið 2015. Á þeim tíma fór leikkonan með hlutverk í einleiknum Grounded á Broadway. Hathaway rifjaði upp þetta átakanlega tímabil í nýlegu viðtali við lífstílstímaritið Vanity Fair. 

„Þetta gekk ekki upp í fyrstu atrennu. Ég var að leika í sýningu á þessum tíma og þurfti að fæða barn á sviðinu á hverju kvöldi. Það var rosalega erfitt,“ sagði Hathaway sem hélt fósturlátinu vandlega leyndu frá vinum og vandamönnum í fyrstu. 

„Það var hálf ómögulegt að halda þessu út af fyrir sig og láta ekki á neinu bera á sviðinu. Það fékk mig til að segja mínum allra nánustu frá því sem var í gangi,“ útskýrði leikkonan. 

Hathaway varð ófrísk nokkrum mánuðum eftir fósturlátið og eignaðist sitt fyrsta barn árið 2016. Í dag er leikkonan tveggja barna móðir, en hún og eiginmaður hennar Adam Shulman eiga tvo unga syni, Jonathan og Jack.