Magn kviku sem hefur bæst við kvikuhólfið undir Svartsengi frá því að eldgos hófst 16. mars nálgast 13 milljónir rúmmetra. Magnið í hólfinu hefur aldrei farið yfir þau mörk án þess að það bresti og kvika hlaupi fram.

Þetta segir Benedikt Gunnar Ófeigsson, fagstjóri aflögunarmælinga hjá Veðurstofu Íslands, í nýjasta þætti Dagmála sem birtist í morgun.

„Skiljum ekki allt sem er í gangi þarna undir“

Kraftur eldgossins við Sundhnúkagígaröðina hefur farið dvínandi undanfarna daga. Í gær var framleiðnin komin undir einn rúmmetra á sekúndu. Telur Benedikt líklegt að eldgosið sé að líða undir lok. Í gærkvöldi sást lítil sem engin virkni í gígnum í vefmyndavélum.

Frétt af mbl.is

40 skjálftar í kvikuganginum

Ef kvika hleypur fram telja jarðvísindamenn líklegt að hún leiti annaðhvort upp um sömu sprung og þegar gýs úr eða brjótist upp á svipuðum slóðum.

„Það sem við höfum mestar áhyggjur af er þessi upphafsfasi þar sem við sjáum mjög mikið flæði á stuttum tíma þar sem er mikið hraunflæði sem getur farið langt kannski á fyrstu sex-sjö klukkutímunum. Þá getur hraun runnið marga kílómetra eins og við höfum séð í upphafi allra hinna gosanna.

Það er þessi upphafsfasi sem er hættulegastur en það er erfitt að segja hvað hann verður stór. En þetta eru kannski 700 rúmmetrar á sekúndu.“