Rúmlega 40 jarðskjálftar hafa mælst síðasta sólarhringinn í kvikuganginum við Svartsengi.
Að sögn Böðvars Sveinssonar, náttúruvársérfræðings á Veðurstofu Íslands, er það svipaður fjöldi og í gær.
Fleiri jarðskjálftar urðu við Kleifarvatn í nótt í kjölfar skjálftans þar í gær sem mældist 3,3 stig en þeir voru ekki stórir.
Böðvar segir að trúlega sé um gikkskjálfta að ræða sem gætu tengst eldgosinu við Sundhnúkagíga.
Staðan á eldgosinu er annars sú að það mallar áfram á svipaðan hátt og í gær. Í nótt var hægt að sjá greinilega gosvirkni í gígnum þótt hún væri lítil.