Borgarstjóri Toronto, Rob Ford, er nú á leið í meðferð við áfengisvanda en fyrir um ári var hann hvattur til að fara í meðferð en harðneitaði að fara.

Enn eitt myndskeiðið af Ford hefur nú verið birt á netinu. Það er sagt tekið nýlega og á því má sjá hann reykja það sem talið er vera krakk. Fyrir ári komst annað myndband af slíkri hegðun hans í umferð. Samstarfsfólk hans og fjölskylda hvatti hann þá til að leita sér hjálpar en Ford neitaði og hélt uppteknum hætti. Meðferðarúrræði var einn þriggja kosta sem lagðir voru fyrir borgarstjórann þá. 

Ford segist hins vegar ekki vera að fara í meðferð vegna eiturlyfjafíknar heldur áfengisneyslu.

Skrifstofustjóri borgarstjórans segir að þó að Ford sé farinn í meðferð verði rekstur borgarinnar með sama hætti og áður. Ford hefur þó afsalað sér öllum völdum tímabundið eða á meðan meðferðinni stendur. Hann sækist eftir endurkjöri sem borgarstjóri. 

Ford er mjög umdeildur en nýtur þó hylli meðal borgarbúa, þrátt fyrir að fréttir af fíkniefnanotkun hans hafi ítrekað ratað í fjölmiðla. Þá hefur hann látið ýmislegt flakka, m.a. móðgað aðra frambjóðendur í borgarstjórnarkosningunum. Gagnrýndi hann m.a. einn fyrir að „styðja alla samkynhneigða“.

„Sem eldri bróðir hans er ég feginn að hann ætli að horfast í augu við vandamál sín og hafi ákveðið að leita sér hjálpar,“ sagði bróðir hand Doug Ford á blaðamannafundi í gær. Átti stóri bróðir erfitt með að halda aftur af tárunum. Í ágúst sagðist hann aldrei hafa séð borgarstjórann bróður sinn bragða áfengi.