Erlent | mbl | 11.8.2015 | 6:37

Neyðarástand í Ferguson

Lýst hefur verið yfir neyðarástandi í borginni Ferguson í Missouri í Bandaríkjunum. Spennan hefur aukist í borginni frá því á sunnudag, þegar þess var minnst að eitt ár er liðið frá því að ungur blökkumaður, Michael Brown, féll fyrir hendi lögregluþjóns.

Til snarpra átaka kom á milli hóps mótmælenda og lögreglunnar og varð einn ungur maður fyrir byssuskoti lögregluþjóns. Maðurinn, hinn átján ára gamli Tyrone Harris, var fluttur á sjúkrahús lífshættulega slasaður. Hann var í gær ákærður fyrir árás á lögregluþjóna, en lögreglan sakar hann um að hafa skotið að sér fyrst.

Jay Nixon, ríkisstjóri Missouri, biðlar til mótmælenda að halda mótmælunum friðsömum.

Talsverð átök voru í Ferguson í nótt og voru meðal annars nokkrir óeirðaseggir handteknir. Kastað var grjóti og vatnsflöskum í átt að lögregluþjónum. Í gær voru um fimmtíu mótmælendur handteknir við dómshúsið í borginni.

Alda mótmæla og óeirða spratt upp í kjölfar þess að hvítur lögregluþjónn skaut Brown til bana í ágústmánuði árið 2014. Málið í nótt er eitt fjölmargra sem hafa komið upp í landinu undanfarið þar sem hvítir lögregluþjónar skjóta blökkumenn og hafa vakið mikla reiði vestanhafs, sem og víðar.