Norska lögreglan hefur fengið um 150 ábendingar í tengslum við rannsókn á hvarfi hinnar 68 ára gömlu Anne-Elisabeth Hagen eftir að hafa birt upptöku úr eftirlitsmyndavél fyrir utan skrifstofu Toms Hagen, eiginmanns Anne-Elisabeth.
Henni var rænt fyrir tíu vikum og krefjast mannræningjarnir þess að eiginmaður hennar greiði 85,9 milljónir norskra króna, sem svarar til 1,2 milljarða íslenskra króna, í lausnargjald. Mannræningjarnir fara fram á að greitt verði í rafmynt sem nefnist monero.
Mál Anne-Elisabeth hefur vakið athygli víða um heim, ekki síst fyrir þær sakir hversu langur tími er liðinn frá því hún hvarf. Eiginmaður hennar, Tom Hagen, skipar 172. sætið á lista yfir ríkasta fólkið í Noregi, samkvæmt lista Kapital-tímaritsins en eignir hans eru metnar á 1,7 milljarða norskra króna, sem svarar til 23,7 milljarða króna. Hagen er umsvifamikill í fasteignaviðskiptum og á auk þess 70% hlut í orkufyrirtækinu Elkraft.
Upptakan úr eftirlitsmyndavélinni er frá deginum sem hún hvarf, 31. október í fyrra. Mennirnir þrír sem sjást á upptökunni hafa ekki gefið sig fram við lögreglu en fjöldi ábendinga hefur hins vegar borist.
Þetta er meðal þess sem kom fram á blaðamannafundi lögreglu í morgun. Tommy Brøske, sem stýrir rannsókn málsins, segir að ábendingarnar tengist meðal annars mannaferðum og ökutækjum. Mennirnir þrír hafa stöðu vitna í málinu og óskar lögregla áfram eftir því að ná tali af þeim. Tveir þeirra sjást á göngustíg fyrir utan skrifstofu Toms en sá þriðji á hjóli.
Lögreglan greindi frá því í gær að vinnustaður Toms hafi verið vaktaður á meðan mannræningjarnir voru að verki á heimili hjónanna. Brøske segir að rannsóknin sé í algjörum forgangi hjá lögreglunni en lögreglan er engu nær um hvar Anne-Elisabeth er eða hvort hún er lífs eða liðin. Færanlegri lögreglustöð hefur verið komið upp í nágrenni heimilis hjónanna þar sem tekið er á móti ábendingum.