Nýr leiðtogi hryðjuverkasamtakanna Ríkis íslams er „núll og nix“ og Bandaríkin vonast til þess að hann verði kominn undir græna torfu fyrr en seinna. Þetta sagði háttsettur bandarískur embættismaður í dag.
Samtökin útnefndu nýjan leiðtoga en Abu Bakr al-Baghdadi, fyrrverandi leiðtogi samtakanna, lést í árás bandarískra sérsveitarmanna á fylgsni hans í síðasta mánuði.
Abu Ibrahim al-Hashemi al-Qurayshi er hinn ekki svo merkilegi nýi leiðtogi.
„Þessi gaur er algjört núll og nix,“ sagði embættismaðurinn í samtali við fréttamenn í dag. Hann sagði að stuðningsmenn hryðjuverkasamtakanna á samfélagsmiðlum klóruðu sér í kollinum yfir því um hvern væri að ræða.
„Það litla sem við vitum um hann er ekki merkilegt. Ef hann er annaðhvort í Írak eða Sýrlandi þarf heimurinn ekki að hafa áhyggjur af honum lengi,“ bætti embættismaðurinn við.