Um það bil 70 lögreglumenn hafa særst í mótmælum í þýsku þorpi sem verið er að rífa til að rýma fyrir stækkun kolanámu. Í aðgerð sem hófst á miðvikudag hafa hundruð lögreglumanna fjarlægt aðgerðasinna frá þorpinu Luetzerath í vesturhluta Þýskalands.
Þúsundir mótmælenda komu saman í þorpinu í gær, þar á meðal sænska baráttukonan Greta Thunberg. Sumir mótmælenda lentu í átökum við lögreglu.
Aðgerðasinnar sökuðu lögreglu um að nota kylfur, piparúða, hunda og hesta gegn þeim, en að minnsta kosti 20 aðgerðasinnar hafa verið fluttir á sjúkrahús til aðhlynningar. Sumir þeirra voru ýmist barðir í höfuðið eða í magann af lögreglu, að sögn Birte Schramm, læknis í hópnum.
Skipuleggjendur telja að mótmælendur hafi verið alls 35 þúsund á laugardag, en lögregla segir töluna vera 15 þúsund. Ástandið hafi verið heldur rólegra í dag, að sögn lögreglu.
Verið er að rífa þorpið til að rýma fyrir stækkun kolanámu, sem þegar er ein sú stærsta í Evrópu. Náman er rekin af orkufyrirtækinu RWE.
Lögregla hefur hafið rannsókn á um 150 sakamálum vegna mótmælanna, meðal annars vegna mótspyrnu gegn lögreglumönnum, eignaspjalla og friðarrofs.