Dönsk og úkraínsk stjórnvöld hafa samið um aukið öryggis- og varnarsamstarf til næstu tíu ára. Samningurinn er metinn á 1,7 milljarða danskra króna, eða sem jafngildir 34 milljörðum íslenskra króna.
Nýlega skrifaði Úkraína undir sambærilega samninga við Þýskaland, England og Frakkland.
„Samkomulagið felur í sér að gerður verði gagnkvæmur rammasamningur um stuðning við her og borgara fyrir næstu tíu árin,“ segir í tilkynningu frá danska utanríkisráðuneytinu.
Sérstakur Úkraínusjóður á vegum danska ríkisins, sem er metinn á 69,1 milljarð danskra króna, mun fjármagna stuðninginn.