Ísraelsher hefur lagt fram áætlun um brottflutning almennra borgara frá „bardagasvæðum” á Gasasvæðinu.
Þetta kemur fram í tilkynningu frá skrifstofu Benjamíns Netanjahú, forsætisráðherra Ísraels.
Netanjahú hefur talað um að hernaður á jörðu niðri á svæði Palestínumanna í borginni Rafah á suðurhluta Gasasvæðisins sé nauðsynlegur.
Erlendar ríkisstjórnir og hjálparstofnanir hafa ítrekað lýst yfir áhyggjum sínum vegna innrásar í Rafah og þeim fjölda almennra borgara sem gæti fallið.
Yfir 1,4 milljónir Palestínumanna, flestir á flótta, hafa safnast saman í Rafah og þangað hafa hermenn Ísraels á jörðu niðri ekki farið hingað til.
Neyðaraðstoð hefur einnig borist þangað í gegnum nágrannaríkið Egyptaland.
Í yfirlýsingu Ísraela í morgun kemur fram að Ísraelsher hafi kynnt fyrir yfirvöldum áætlun um brottflutning fólks frá bardagasvæðum á Gasasvæðinu. Ekkert kemur fram um hvert á að flytja fólkið.