Rúmlega tvö þúsund manns grófust lifandi undir aurskriðum sem féllu yfir þorp og vinnubúðir í Papúa Nýju–Gíneu á föstudag. Þetta tilkynntu yfirvöld á eyjunni Sameinuðu þjóðunum í dag.
Yfirvöld heimsóttu hamfarasvæðið í gær.
Tala látinna hefur verið á reiki. Í fyrstu var talið að nokkrir tugir hefðu farist en ekki leið á löngu þar til staðfestur fjöldi látinna var kominn í 670. Var þó við búið að mun fleiri hefðu grafist undir skriðunum.
Aurskriðurnar ollu mikilli eyðileggingu á byggingum og matjurtagörðum og kemur til með að hafa mikil áhrif á efnahagslíf í landinu, að sögn Lusete Laso Mana, starfsmanns í hamfaramiðstöð á svæðinu, í bréfi til Sameinuðu þjóðanna.
Í bréfinu var lögð áhersla á að aðstæður til björgunar á svæðinu væru erfiðar.
Aðalhraðbrautin að svæðinu er lokuð, segir í bréfinu, og jörðin enn óstöðug þar sem vatn rennur undir jarðveginum. Það er því enn mikil hætta fyrir bæði björgunarsveitir og eftirlifendur á svæðinu.
Tedros Adhanom Ghebreyesus, framkvæmdastjóri Alþjóðaheilbrigðismálastofnunarinnar (WHO), hefur lýst yfir mikilli sorg vegna málsins og segir stofnun Sameinuðu þjóðanna reiðubúna til að aðstoða.
„Hjörtu okkar eru hjá fólkinu í Papúa Nýju-Gíneu sem missti ástvini í skriðunum. Við erum reiðubúin að styðja ríkisstjórnina til að mæta brýnum heilbrigðisþörfum,“ skrifaði Ghebreyesus á miðilinn X.