Hlé á fundum Radda fólksins

Hörður Torfason, forsprakki Radda fólksins.
Hörður Torfason, forsprakki Radda fólksins. mbl.is/Ómar

Raddir fólksins, sem hafa staðið fyrir mótmælafundum á Austurvelli í allan vetur, eða síðan 11. október, boðuðu í kvöld hlé á fundunum um óákveðinn tíma. Enginn fundur verður því á Austurvelli á morgun, laugardaginn 21. mars. Þetta kemur fram í tilkynningu frá Herði Torfasyni, forsvarsmanni hópsins, í kvöld.

„Fólk er engu að síður hvatt til að láta ekki deigan síga og vera á verði, viðhafa gagnrýna hugsun og veita íslenskum stjórnmála- og peningamönnum virkt aðhald.  Fundir Radda fólksins hafa byggst á sjálfsprottnu og ólaunuðu framtaki vegna þeirra mannréttindabrota sem framin hafa verið á þjóðinni,“ segir í tilkynningu Harðar.

Þar segir ennfremur: „Fundirnir hafa haft mikil áhrif, verið leiðandi afl í því andófi sem viðhaft hefur verið, náð mjög miklum árangri og verið fastur punktur í tilveru þúsunda Íslendinga í allan vetur. Fundirnir hafa ekki síst veitt gríðarlega stórum hópi fólks félagslegan og andlegan stuðning í þeim hremmingum sem dunið hafa á íslensku samfélagi. Vel á sjötta tug ræðumanna hafa haldið þar ræður undir yfirskriftinni: Breiðfylking gegn ástandinu. Raddir fólksins biðjast velvirðingar á hve seint þessi ákvörðun var tekin en það var af óviðráðanlegum ástæðum. Við munum halda vöku okkar áfram og boða til fundar ef þurfa þykir og almenningur krefst aðgerða.“

mbl.is

Bloggað um fréttina