Steingrímur segist trúa Össuri

Steingrímur J. Sigfússon í ræðustóli Alþingis.
Steingrímur J. Sigfússon í ræðustóli Alþingis.

Steingrímur J. Sigfússon, fjármálaráðherra, sagðist á Alþingi í kvöld trúa þeirri fullyrðingu Össurar Skarphéðinssonar, utanríkisráðherra, um að hann hefði ekki séð kynningu á stöðu Icesave-samninganna, sem lögfræðistofan Mishcon de Reya segist hafa undirbúið fyrir Össur í mars.

Í bréfi lögmannsstofunnar til fjárlaganefndar Alþingis í dag segir, að stofan hafi tekið saman kynningu fyrir Össur í mars og sem hann hafi fengið afhenta í Lundúnum 31. mars. Í þeirri kynningu hafi að ósk Svavars Gestssonar, formanns íslensku samninganefndarinnar, ekki verið upplýsingar um það mat lögmannsstofunnar, að málshöfðun Íslands gegn breska fjármálaeftirlitinu vegna aðgerða breskra stjórnvalda gegn íslensku bönkunum haustið 2008, kynni að styrkja stöðu Íslands í Icesave-viðræðunum.

Össur fullyrti á Alþingi í kvöld, að hann hefði ekki séð þau gögn, sem Mishcon de Reya sendi fjárlaganefnd Alþingis í dag, fyrr en í kvöld, þar á meðal þá kynningu sem sögð var ætluð Össuri.

Vigdís Hauksdóttir, þingmaður Framsóknarflokksins, spurði Steingrím á Alþingi í kvöld hvort lögfræðistofan eða utanríkisráðherra hefðu rétt fyrir sér. Steingrímur sagðist trúa orðum Össurar og teldi sig hafa vissu fyrir því að það sem hann sagði væri rétt. Meðal annars vegna þess að það útskýrði hvers vegna Össur kannaðist ekki við það plagg, sem hann hefði átt að sjá, hefði kynningin fari fram.

„Það benda mjög sterkar líkur til þess, að lögfræðistofuna misminni hressilega þegar hún fullyrðir að hún hafi kynnt utanríkisráðherra þetta með „glærusjói" sem utanríkisráðherra hafði aldrei séð og vissi ekki að væri til," sagði Steingrímur.

Hann sagði einnig ljóst af gögnum málsins, að kynning var fyrirhuguð því lögmannsstofan var að undirbúa hana. Sú kynning hafi hins vegar ekki farið fram og það skýri hvers vegna göngin fundust ekki í skjalasafni utanríkisráðuneytisins þegar að þeim var leitað.

Steingrímur lýsti einnig efasemdum um það sem kemur fram í bréfi lögfræðistofunnar að Svavar hafi viljað halda tilteknum gögnum leyndum fyrir Össuri, yfirmanni sínum.

„Að þrautreyndur embættismaður og sendiherra, sem væntanlega kann þá grundvallarreglu að ráðherra eigi að sjá allt sem skiptir máli, hafi farið að óska eftir slíku. Ég á afar erfitt með að trúa því," sagði Steingrímur en sagðist engin gögn hafa í höndum um þetta.

mbl.is