Fleiri karlar en konur kusu

Talið í þjóðaratkvæðagreiðslunni.
Talið í þjóðaratkvæðagreiðslunni. mbl.is/Árni Sæberg

Ráðgefandi þjóðaratkvæðagreiðsla fór fram 20. október 2012. Við kosningarnar voru alls 236.850 á kjörskrá, 73,9% landsmanna. Af þeim greiddu 115.890 atkvæði, 48,9% kjósenda. Kosningaþátttaka karla var hærri en kvenna, 49,9% á móti 47,9% hjá konum.

Þetta kemur fram í úttekt Hagstofunnar á kosningunum.

Í þjóðaratkvæðagreiðslunni voru greidd atkvæði um tillögur stjórnlagaráðs að frumvarpi til stjórnarskipunarlaga og tiltekin álitaefni þeim tengd. Hafði Alþingi samþykkt þingsályktunartillögu þar að lútandi 24. maí 2012 þar sem jafnframt var kveðið á um þær sex spurningar sem bornar voru upp í atkvæðagreiðslunni. Gild atkvæði voru 114.570, auðir seðlar 661 og aðrir ógildir seðlar 659.

Úrslit atkvæðagreiðslunnar voru mismunandi eftir spurningum en hverri og einni spurningu var svarað jákvætt með meirihluta gildra atkvæða á landinu í heild. Alls töldu 73.509 kjósendur að leggja ætti tillögur stjórnlagaráðs til grundvallar frumvarpi að nýrri stjórnarskrá. Sú spurning sem flestir svöruðu með jái var spurning um náttúruauðlindir í þjóðareign, alls 84.760, en sú sem fæstir svöruðu með jái var spurning um að setja ákvæði um þjóðkirkjuna í stjórnarskrá, 58.455.

mbl.is

Bloggað um fréttina