Jarðskjálfti sem mældist 4,1 stig varð í Bárðarbungu í Vatnajökli klukkan 6.19 í morgun. Nokkrir eftirskjálftar fylgdu og eru jarðvísindamenn Veðurstofu Íslands nú að fara yfir þau gögn sem hafa borist. Stærsti skjálftinn varð sunnan megin í Bárðarbunguöskjunni. Annar snarpur skjálfti, 2,8 stig, mældist í gærkvöldi.
Samkvæmt upplýsingum frá Veðurstofunni eru engin merki um gosóróa samhliða skjálftunum í morgun.
Mælingar jarðvísindamanna við Háskóla Íslands benda til að í syðri sigkatli Bárðarbungu séu um 100 metrar niður á vatn.