Björgunarsveitir voru kallaðar út að Hlíðarsmára í Kópavoginum á níunda tímanum í morgun eftir að rúða fór úr glugga í ofsaveðrinu. Fyrr í morgun höfðu björgunarsveitamenn verið kallaðir til þegar svalahurð fór af annars staðar í borginni.
Lítið hefur annars verið um fok- eða veðurtengd útköll hjá björgunarsveitum til þessa. Fyrr í morgun bárust nokkrar tilkynningar um fasta bíla í Þrengslunum, við Esjumela og Sandskeið, en annars hafa björgunarsveitir að mestu séð um að manna lokunarpósta.
102 björgunarsveitarmenn voru til taks á áttunda tímanum í morgun og manna þeir m.a. lokanir vega, en lokað hefur verið á allar aðalleiðir í og úr borginni, en veðrið á að ná hámarki nú á tíunda tímanum.