Tæplega 40 þúsund krónur fyrir „Hraunhlaupið“

Nýtt 7,6 kílómetra utanvegahlaup frá Jarðböðunum í Mývatnssveit, í gegnum Vogaland og með endamark í Dimmuborgum 25. maí verður tengt Mývatnsmaraþoninu daginn eftir.

Reiknað er með 30-40 þátttakendum í utanvegahlaupinu, sem kallað er Hraunhlaupið (Lava Run).

Þar sem Dimmuborgir eru friðlýstar sem náttúruvætti þarf sérstakt leyfi frá Umhverfisstofnun fyrir viðburðinum og hefur það nú verið veitt með ákveðnum skilyrðum um framkvæmd. Samkvæmt gjaldskrá stofnunarinnar verða innheimtar 39.400 krónur vegna vinnslu og afgreiðslu umsóknarinnar. Fyrirhugað er að kynna Hraunhlaupið á næstunni, að því er fram kemur í Morgunblaðinu í dag.