Biblíubréfið, dýrasta bréf í sögu Íslands, var flutt úr verðmætageymslu Securitas í TM-höllina í Garðabæ í dag í fylgd lögreglu. Bréfið er frá árinu 1876 og á því eru einstök þjónustufrímerki, bæði í íslenskri og norrænni frímerkjasögu.
Bréfið tilheyrir einkasafni sænska greifans og frímerkjasafnarans Douglas Storckenfeldt. Safnið verður til sýnis í heild sinni á norrænu frímerkjasýningunni Nordia í TM-höllinni í Garðabæ um helgina. Allt safnið er metið á um hálfan milljarð króna.
Öryggisverðir á vegum Securitas sáu um flutninginn sem gekk eins og í sögu en þeir nutu aðstoðar lögreglu við verkið.