„Þetta er mjög sérstakt,“ segir Árni Einarsson, náttúrufræðingur hjá Náttúrurannsóknarstöðinni við Mývatn, um túrkísbláa rönd sem myndaðist við strönd Mývatns í gær. Um er að ræða svokallaðar blábakteríur sem leysast upp í vatninu og losa frá sér örsmá lofthylki sem lita vatnið þessum einstaka bláma.
Árni segir að óvanalegt sé að blái liturinn sjáist með þessum hætti á Íslandi. Aðeins séu innan við tíu vötn hér á landi sem hafa bakteríurnar í slíku magni.
„Þetta gerist í vötnum sem eru frekar næringarauðug, eru með mikið af næringarefnum. Það er frekar óvanalegt að þetta gerist á Íslandi því við erum það norðarlega en það eru þó nokkur vötn sem hafa alltaf haft svona bakteríur og þar á meðal er Mývatn,“ segir Árni.
Sérstök skilyrði þurfa jafnframt að vera fyrir hendi svo liturinn sjáist því hreyfing á vatninu verður til þess að bakteríurnar hreyfast með og liturinn dofnar.
„Maður þarf að vera á réttum stað og réttum tíma til þess að sjá þetta,“ segir hann.
Hér má sjá Facebook-færslu Náttúrurannsóknastöðvarinnar