Alþjóðlega ráðstefnan Björgun hófst í Hörpu í morgun en hún hefur verið haldin á tveggja ára fresti frá árinu 1990. Innlendir og erlendir sérfræðingar flytja fyrirlestra um leitar- og björgunarmál.
Ráðstefnunni hefur vaxið fiskur um hrygg, fjöldi fyrirlestra hefur aukist ár frá ári og nú verða þeir rúmlega 50 talsins. Rúmlega 1.000 gestir sækja ráðstefnuna frá 17 löndum.
Samhliða ráðstefnunni er efnt til viðamikillar vörusýningar þar sem ráðstefnugestir geta kynnt sér allt það nýjasta sem í boði er fyrir leitar- og björgunarfólk.
Meðal fyrirlesara er Rick Stanton. Hann er breskur borgaralegur hellakafari sem sérhæfir sig í björgunarstarfi með hellabjörgunarsamtökunum Cave Rescue Organization og breska hellabjörgunarráðinu. Hann flytur tvo fyrirlestra um hellabjörgunina í Taílandi í sumar.