Ljósin voru kveikt á jólatrénu á Ráðhústorgi á Akureyri síðdegis. Tréð er að vanda gjöf frá vinabænum Randers í Danmörku og afhenti Helgi Jóhannesson, konsúll Dana á Akureyri og forstjóri Norðurorku, jólatréð formlega.
Lúðrasveit Akureyrar spilaði nokkur jólalög undir stjórn Sóleyjar Einarsdóttur og Barnakór Akureyrarkirkju söng með dyggri aðstoð vaskra jólasveina sem komu kafrjóðir til byggða. Sigrún Magna Þórsteinsdóttir stjórnaði kórnum og spilaði undir.
Ásthildur Sturludóttir bæjarstjóri sagði einnig nokkur orð og að því loknu tendraði hin þriggja ára gamla Svala Sandgreen ljósin á trénu. Að lokum tóku jólasveinarnir lagið með áhorfendum og gáfu börnunum góðgæti, sum fengu mandarínur en einnig var eitthvað um kartöflur, en það skyggði ekki á gleðina sem tók öll völd á Ráðhústorginu, líkt og sjá má á meðfylgjandi myndum sem Þorgeir Baldursson, fréttaritari Morgunblaðsins, tók.