Flugvél Titan Airways sem var á leið frá Bretlandi til Akureyrar þurfti að lenda á Egilsstöðum sökum slæmrar veðráttu. Guðjón Helgason, upplýsingafulltrúi Isavia, segir að farþegar séu enn um borð í vélinni og að leitast verði eftir því að fljúga til Akureyrar þegar veðrið gengur niður.
Mikill vindur, ofankoma og lélegt skyggni gerði það að verkum að vélin, sem flýgur á vegum bresku ferðaskrifstofunnar Superbreak, þurfti að lenda á Egilsstaðaflugvelli.
Superbreak byrjaði að bjóða upp á flugferðir frá Bretlandi til Akureyrar í desember en ferðaskrifstofan bauð einnig upp á slíkt í fyrra.
Nokkur röskun er á flugumferð vegna veðurs í dag en flugferð Iceland Air Connect frá Reykjavík til Ísafjarðar var frestað í morgun, auk þess sem flugferð til Akureyrar sem áætlað var klukkan 11.30 seinkaði en vélin fór í loftið klukkan 13.03.