Lögreglan á höfuðborgarsvæðinu hafði afskipti af nokkrum ökumönnum í nótt. Ökumaður sem var stöðvaður í Breiðholti reyndist undir áhrifum fíkniefna og hafði hann verið sviptur ökuréttindum, auk þess sem bifreiðin sem hann ók á var á röngum skráningarmerkjum. Einnig fundust fíkniefni í bifreiðinni.
Þá voru þrír ökumenn til viðbótar stöðvaðir í Breiðholti sem reyndust réttindalausir. Skráningarmerki voru fjarlægð af bifreið eins þar sem hún hafði ekki verið skoðuð á tilsettum tíma. Hjá öðrum fundust sterar í bifreiðinni.
Lögreglan hafði einnig afskipti af einum ökumanni sem ók yfir á rauðu ljósi.