Kona hrækti í andlit lögreglumanns og var dæmd til að sitja einn mánuð í fangelsi er dómur féll í máli hennar fyrir Héraðsdómi Reykjavíkur í gær.
Konan játaði skýlaust brot sitt og tók fram fyrir dómi að hún iðraðist gjörða sinna. Ef konan heldur skilorð sitt í tvö ár fellur fullnusta refsingar niður.
Samkvæmt sakavottorði hennar hefur hún þrisvar brotið lögin. Hún hefur gengist undir greiðslu sektar með sektargerð lögreglustjóra í tveimur tilvikum vegna umferðarlagabrota og einu sinni vegna brots gegn lögum um ávana- og fíkniefni.
Atvikið átti sér stað aðfaranótt 17. júní í fyrra.