Miðnæturhlaup Suzuki fór fram í Laugardal í kvöld. Á þriðja þúsund hlaupara lagði upp frá Engjavegi kl. 21, en keppt var í þremur vegalendum, hálfmaraþoni, tíu kílómetra hlaupi og fimm kílómetra hlaupi.
Yfir eitt þúsund erlendir hlauparar voru á meðal þátttakenda í ár, en þetta í var í 27. skipti sem hlaupið var haldið.
Arnar Pétursson var fljótastur allra í hálfmaraþoninu, en hann hljóp á tímanum 01:10:20. Í kvennaflokki var hin bandaríska Marissa Saenger fyrst í mark á tímanum 01:29:14, sekúndu á undan samlöndu sinni Michelle Hazelton, en Íris Dóra Snorradóttir var í 3. sæti og fyrst íslenskra kvenna í mark á tímanum 01:31:17.
Í tíu kílómetra hlaupinu kom Þórólfur Ingi Þórsson fyrstur í mark í karlaflokki á tímanum 33:29, en í kvennaflokki kom Elín Edda Sigurðardóttir fyrst í mark á tímanum 36:50.
Vilhjálmur Þór Svansson var svo allra karla sneggstur í fimm kílómetra hlaupinu, á sextán mínútum sléttum. Andrea Kolbeinsdóttir var sneggst kvenna, á tímanum 17:34.
Úrslit hlaupsins í heild sinni
Ljósmyndari mbl.is var í Laugardalnum í kvöld og tók meðfylgjandi myndir af þátttakendum.