Notkun samfélagsmiðla mælist hæst á Íslandi meðal EES-landa og aðildarríkja Evrópusambandsins. Áætlað er að um 91% Íslendinga noti samfélagsmiðla en næstmest notkun mældist í Noregi, þar sem áætlað er að um 82% landsmanna noti samfélagsmiðla.
Þetta eru niðurstöður rannsóknar Eurostat, hagstofu Evrópusambandsins. Í umfjöllun um þær í Morgunblaðinu í dag segir Guðrún Katrín Jóhannesdóttir, félagsfræðingur og ráðgjafi hjá Streituskólanum, að notkun samfélagsmiðla þurfi ekki endilega að vera neikvæð:
„Það er ýmislegt neikvætt og annað jákvætt við notkunina. Það er svo margt í dag sem við getum séð inni á samfélagsmiðlum – við getum fylgst með fjölskyldunni og fréttamiðlum þar til dæmis,“ segir hún.
Metnotkun er hjá Íslendingum á aldrinum 65 til 74 ára í samanburði við aðrar þjóðir. Samkvæmt rannsókninni nota 65% Íslendinga í þeim aldurshópi samfélagsmiðla, en meðaltal Evrópusambandsþjóða var 19% í sama flokki.