Skipunum verði sökkt til varðveislu

Bæjarstjórn Ísafjarðarbæjar samþykkti á dögunum tillögu Sigurðar J. Hreinssonar, bæjarfulltrúa Í-listans, um að kanna möguleika á að útbúa skipakirkjugarð í einhverjum innfjarða Ísafjarðardjúps.

Þær slóðir tilheyra Súðavíkurhreppi og hefur sveitarstjórnin nú samþykkt að kanna málið betur.

Saga þessi er í stuttu máli sú að í höfnum má víða finna skip sem eru að grotna niður og endurgerð þeirra er ólíkleg sakir kostnaðar. Sagt er því vænlegra að sökkva nokkrum skipunum saman á sjávarbotni og búa þannig til áhugaverðan leikvöll fyrir sportkafara.

Í samtali í Morgunblaðinu um þetta mál þetta í dag segir Sigurður Hreinsson að með góðu skipulagi og umhverfisvöktun geti skipakirkjugarður verið góður kostur.