Sex slökkviliðsmenn af Norður- og Suðurlandi ætla að sleppa útihátíðum um verslunarmannahelgina þetta árið og skella sér heldur í 340 kílómetra hálendishlaup til þess að safna fyrir barnadeild Sjúkrahússins á Akureyri.
Sexmenningarnir munu hlaupa einskonar boðhlaup yfir hálendið, 5 til 20 kílómetra í einu. Hlaupið hefst á Akureyri og lýkur því á Selfossi.
Þrautaganga slökkviliðsmannanna ber heitið Gengið af göflunum en slökkviliðsmenn frá Akureyri stóðu fyrir svipuðu verkefni árið 2017 þegar þeir gengu m.a. Eyjafjarðarhringinn, sem er 30 kílómetrar, í fullum slökkviliðsskrúða.
„Þessi leið sem við förum núna er talsvert meiri áskorun. Við ætlum ekki að vera í reykköfunarbúningum í þetta skipti enda er leiðin mjög löng,“ segir Hörður Halldórsson, skipuleggjandi og einn af slökkviliðsmönnunum sem ætla að taka þátt í hlaupinu, í Morgunblaðinu í dag.
Sjá viðtal við Hörð í heild á baksíðu Morgunblaðsins í dag.