Vegagerðin varar við snörpum vindhviðum í Öræfasveit eftir hádegi. Búast má við varasömum hviðum þvert á veg, allt að 30-35 metrum á sekúndu. Veðurfræðingur Vegagerðarinnar segir að hvassast verði í grennd við Svínafell og Freysnes.
Hvassviðrið mun ná hámarki í kvöld, en lagast heldur snemma í nótt. Ökumenn með aftanívagna og á ökutækjum sem eru viðkvæm fyrir vindi eru beðnir um að fara varlega.
Ákveðin norðanátt er á landinu í dag og dálítil væta norðan- og austanlands og fremur svalt, en annars yfirleitt léttskýjað og hlýtt að deginum, að því er fram kemur í hugleiðingum veðurfræðings á Veðurstofu Íslands.
Þá lægir á mánudag og birtir víða til nyrðra, en snýst síðan í austan- og suðaustanátt með rigningu sunnan heiða og hlýnar heldur fyrir norðan og austan.