Vegir á Suðvesturlandi eru meira og minna lokaðir: Á Suðurnesjum, Reykjanesbraut, Kjalarnesi, Hellisheiði, Þrengslum og Suðurstrandarvegi, samkvæmt upplýsingum frá Vegagerðinni.
Staðan er svipuð á Vesturlandi en þar er mjög slæmt veður. Lokað við Hafnarfjall, á Holtavörðuheiði, Bröttubrekku og Fróðárheiði. Eins er víða ófært á Snæfellsnesi og Svínadalur er ófær.
Á Suðurlandi er enn víða lítið sem ekkert ferðaveður vegna hvassviðris, snjókomu eða skafrennings og slæms skyggnis. Lokað er m.a. á Eyrarbakkavegi og Gaulverjabæjarvegi vegna ófærðar.
Í varúðarskyni var ákveðið að loka veginum milli Ísafjarðar og Súðavíkur í kvöld. Veðurstofan metur aukna snjóflóðahættu með kvöldinu. Athugað verður með opnun snemma í fyrramálið. Nánast allir vegir eru ófærir á Vestfjörðum.
Víða er stórhríð og vegir ófærir eða lokaðir á Norðurlandi og verður ástandið svipað í dag. Vegurinn um Vatnsskarð er lokaður vegna veðurs. Það sama á við um Þverárfjall og Öxnadalsheiði. Vonskuveður er á Norðausturlandi og helstu leiðir ófærar eða lokaðar og verða það í dag. Fjarðarheiði er lokuð en stórhríð er á Fagradal.