Um 270 manns voru viðstaddir innsetningarathöfn Guðna Th. Jóhannessonar í embætti forseta Íslands árið 2016.
Í ár verða þeir aðeins um áttatíu talsins, en vegna hættu á smiti kórónuveiru hefur verið ákveðið að haga athöfninni með öðrum hætti, að því er fram kemur í Morgunblaðinu í dag.
„Það yrði gríðarlegt áfall ef upp kæmi sýking,“ segir Ágúst Geir Ágústsson, skrifstofustjóri skrifstofu yfirstjórnar forsætisráðuneytisins. „Við munum gera allt til að halda þessu í lágmarki. Það eru ýmsir embættismenn sem ekki fá boð að þessu sinni og það sama á við um formenn margra félagasamtaka. Þessu er skipt niður í nokkra flokka.“