Nýja veirutækið loksins komið til landsins

Nýja tækið mun u.þ.b. tvöfalda afkastagetu sýkla- og veirufræðideildar og …
Nýja tækið mun u.þ.b. tvöfalda afkastagetu sýkla- og veirufræðideildar og gjörbylta þjónustu spítalans. mbl.is/Árni Sæberg

Eitt fullkomnasta og afkastamesta greiningartæki heims lenti á Keflavíkurflugvelli núna um kvöldmatarleytið eftir flug frá Frankfurt um borð í úkraínskri Antonov-herflutningavél. Tækið verður tekið til notkunar á sýkla- og veirufræðideild Landspítalans á næstu dögum og vikum og mun gjörbylta afkastagetu deildarinnar.

Tækisins hefur verið beðið með mikilli eftirvæntingu, sér í lagi þar sem afhendingu þess seinkaði. Það átti upphaflega að koma í nóvember og verða gangsett fyrir jól. Nú er það þó loksins komið.

„Við erum bara í skýjunum yfir þessu,“ segir Karl G. Kristinsson, yfirlæknir á sýkla- og veirufræðideild, í samtali við mbl.is.

Tækið mun geta greint á fjórða þúsund veirusýni í einu og verður sýkla- og veirufræðideild LSH ekki lengur háð aðstoð Íslenskrar erfðagreiningar sem aðstoðað hefur deildina við greiningu kórónuveirusýna svo að segja frá upphafi faraldursins.

Greiningargeta sýkla- og veirufræðideildar LSH var fyrir kórónuveirufaraldurinn um 2.000 sýni á dag og við það bætast nú um 4.000 sýni. Algjör bylting, eða hvað?

„Það má segja að þetta sé mikil bylting fyrir okkur, já. Mikil markverð viðbót fyrir okkur í bæði afkasta- og greiningargetu,“ segir Karl.

Undirbúningur fyrir komu tækisins hefur staðið í langan tíma og segir Karl að tækið muni fylla heilt herbergi í húsakynnum sýkla- og veirufræðideildar. Þannig hafi upphaflega staðið til að flytja tækið í fraktflugvél Icelandair en tækið hafi ekki passað inn í vélina.

„Þá ákvað framleiðandinn bara að leigja þessa rússnesku Antonov-vél, sem mér skilst að sé í ætt við Hercules-vélarnar bandarísku.“

Karl G. Kristinsson, yfirlæknir á sýkla- og veirufræðideild Landspítala.
Karl G. Kristinsson, yfirlæknir á sýkla- og veirufræðideild Landspítala. mbl.is/Árni Sæberg

Veirugreining flækist vegna veiru 

Vegna kórónuveirufaraldursins er ekki ráðgert að breskir sérfræðingar komist hingað til lands til að aðstoða við uppsetningu tækisins strax.

„Nú reiknum við með að fá tækið upp á deild í næstu viku og þá þarf að setja það saman og gangsetja það en vegna ástandsins fáum við ekki tæknimenn til að gera það. Þeir koma þó strax eftir áramót.“

Áætlað er að nýja tækið muni kosta um 100 milljónir króna og gjörbylta starfsemi sýkla- og veirufræðideildar eins og sagði áðan. Þannig verður hægt að greina sýni sem áður þurfti að senda til útlanda til greiningar.

„Það er ekki bara Covid-19 sem hægt er að greina með þessu tæki, alls ekki. Þetta er mjög sjálfvirkt tæki og það verður hægt að gera alls konar prófanir sem ekki var hægt að gera áður hérlendis.“

mbl.is

Bloggað um fréttina