Nokkur hálka er víða á höfuðborgarsvæðinu og því um að gera fyrir fólk að fara varlega.
Samkvæmt upplýsingum frá vetrarþjónustu Reykjavíkurborgar var byrjað að salta götur klukkan fjögur í nótt. Hálka í húsagötum er nokkur en hún er líkast til minni vegna snjóélja í nótt. Færðin er í lagi á aðalvegum en best er að passa sig á hálkublettum og vera á vel útbúnum bílum.
Fram kemur á vef Vegagerðarinnar að vetrarfærð sé í flestum landshlutum en þó að mestu greiðfært á Suðausturlandi.
Á Vestfjörðum er flughálka á Rauðasandsvegi, Bjarnarfjarðarhálsi og Innstrandavegi. Á öðrum leiðum er hálka, hálkublettir eða snjóþekja.
Á Austurlandi er hálka, snjóþekja eða hálkublettir. Þungfært er á Vatnsskarði eystra og lokað yfir Öxi og Breiðdalsheiði.