Rétt fyrir kl. 1:00 í nótt kom upp stór kaldavatnsleki í lokahúsi vatnsveitu sunnan við aðalbyggingu Háskóla Íslands og lak mikið magn vatns inn í byggingar skólans. Lekinn var um 500l/s og stóð í 75 mínútur áður en náðist að loka fyrir og runnu því út um 2.250 tonn af vatni.

Lekinn uppgötvaðist í stjórnstöð vatns hjá Veitum þegar vart varð mikils þrýstingsfalls í dreifikerfi kalda vatnsins vestan Snorrabrautar að því er segir í tilkynningu frá Veitum. 

Framkvæmdir hafa verið í gangi við endurnýjun vatnslagna á Suðurgötu og er lekinn talinn tengdur þeim.

Slökkviliðið vinnur að því að dæla vatni úr byggingum og er gert ráð fyrir að því starfi ljúki ekki fyrr en um hádegið. Ljóst er að tjónið er gífurlegt.