Innlent | mbl | 6.3.2021 | 8:43 | Uppfært 9:41

Bóluefni keypt fyrir tvo milljarða

Þegar hefur verið samið við fimm fyrirtæki um kaup á bóluefnum gegn kórónuveirunni. mbl.is/Eggert Jóhannesson

Íslenska ríkið hefur samið við fimm lyfjaframleiðendur um kaup á bóluefni og nemur kostnaður rúmum 2,15 milljörðum króna. Þá hefur ríkið tryggt sér kauprétt á bóluefni fyrir 1,85 milljarða til viðbótar. Þetta kemur fram í svari heilbrigðisráðuneytisins við fyrirspurn RÚV.

Eins og áður hefur verið greint frá eru fyrirtækin fimm AstraZeneca, Pfizer/BioNTech, Moderna, Janssen og Curavac. Þá eru líkur á að samið verði við Novavax auk þess sem hugsanlegt er að samið verði við Reithera og Valneva.

Bólusetningardagatal stjórnvalda, sem byggist á fyrirliggjandi uplýsingum um afhendingu bóluefna og spá þar að lútandi, gerir ráð fyrir að búið verði að bólusetja alla þjóðina í lok júnímánaðar.

Sé aðeins gert ráð fyrir þeim þremur bóluefnum sem þegar hafa fengið markaðsleyfi í Evrópu má hins vegar aðeins gera ráð fyrir að 190.000 verði bólusettir fyrir þann tíma. Þórólfur Guðnason hefur þó sagt að hann viti ekki hvort sú áætlun standist.