Tinna Katrin Owen sem lenti í því að lamast, líklega tímabundið, fyrir neðan mitti og liggur nú á taugadeild Landspítalans, segist alls ekki vera mótfallin bólusetningum gegn Covid-19 og vill ekki að reynsla hennar sé notuð sem dæmisaga gegn bólusetningum. 

Tinna lenti í veikindunum eftir að hún fékk örvunarskammt af bóluefni gegn Covid-19. Það var bóluefni framleiðandans Moderna. Ekki er vitað hvort veikindi hennar megi rekja beint til örvunarskammtsins. 

Tinna birti myndband á samfélagsmiðlinum TikTok í gær þar sem hún greindi frá því að hún hefði lamast tímabundið fyrir neðan mitti eftir að hafa fengið Moderna-örvunarskammt. Hefur hún nú orðið vör við að hreyfingar sem tala gegn bólusetningum séu farnar að nota sögu hennar málstað sínum til stuðnings.

Væntanlega tímabundin lömun

Í samtali við mbl.is segist Tinna hafa farið í segulómun í gær, læknarnir segi að lömunin sé tímabundin og mænan sé í fínu standi.

Tiltekur hún einnig að tveir úr fjölskyldu hennar hafi nú þegar fengið örvunarskammt og hafi þau fundið fyrir litlum sem engum aukaverkunum. 

Mbl.is hafði samband við Lyfjastofnun fyrr í dag og fékk þau svör að engin tilkynning hefði borist þeim þess efnis að Moderna-örvunarskammtur hefði valdið lömun. 

Að sögn Tinnu hefur hún nýlega tilkynnt þessa mögulegu aukaverkun.

Í skriflegu svari Landspítalans við fyrirspurn mbl.is kemur fram að stofnunin geti ekki tjáð sig um málið.

Frétt af mbl.is

Engin tilkynning borist um lömun fyrir neðan mitti

Tengdar fréttir

Bólusetningar við Covid-19

„Það þarf að vinna mikinn fjölda upp“

• WHO: Bóluefni bjargað 1,4 milljónum mannslífa
• Bætur ef tjón verður af völdum bólusetningar
• „Flestar þessara aðgerða standast skoðun“
• Ósennilegt að bólusetning orsaki tíðavandamál

» Fleiri tengdar fréttir

• Blogga um frétt