Gengu fram og til baka í snarvitlausu veðri og þoku

Félagar í björgunarsveitinni Þorbirni gengu gönguleiðina að gosstöðvunum í Meradölum fram og til baka í kvöld í svartaþoku og slæmu veðri til að fjölga stikum á gönguleiðinni og stuðla þannig að bættu öryggi í kringum gosstöðvarnar.

Þetta kemur fram í tilkynningu frá björgunarsveitinni.

Að því er fram kemur þar fjölguðu þeir stikum á gönguleiðinni töluvert og settu á þær litað endurskin svo að auðveldara væri að sjá þær.

Í tilkynningunni kemur fram að veðrið hafi verið snarvitlaust og nær ekkert skyggni á gönguleiðinni. Verkefnið tók björgunarsveitina sex klukkustundir en það kláraðist seint í kvöld.

Björgunarsveitin bætti við stikum á gönguleiðinni og setti á þær litað endurskin. Ljósmynd/Björgunarsveitin Þorbjörn

• Blogga um frétt