Helmingur rekstrargjalda Votlendissjóðs á árinu 2021 fór samkvæmt ársreikningi í launakostnað en aðeins um þriðjungur í framkvæmdakostnað. Starfsemi sjóðsins hefur verið skorin niður og samið hefur verið um starfslok við framkvæmdastjóra sjóðsins, eins og mbl.is greindi frá í gær.
Ingunn Agnes Kro, stjórnarformaður Votlendissjóðs, segir ekki hægt að horfa eingöngu í launakostnað og þykir leitt hvernig umræðan hefur að ákveðnu leyti snúið að störfum framkvæmdastjóra.
„Ístak hefur staðið mjög þétt við bakið á Votlendissjóði allt frá stofnun sjóðsins og fyrirtækið hefur gefið sjóðnum framkvæmdir sínar og þar fyrir utan er sjóðurinn á mjög góðum kjörum hjá öðrum verktökum.“
Þannig segir Ingunn að framkvæmdakostnaður sé mun lægri en umfang starfseminnar sýnir.
„Það breytir því þó ekki að við höfum afkastað mjög litlu miðað við það því sem hægt væri að afkasta. Þar hafa ytri aðstæður meira að segja, eins og fjallað hefur verið um,“ segir Ingunn og heldur áfram.
„Ákvörðunin um að semja við framkvæmdastjórann um starfslok var eingöngu tekin vegna þess að fyrirséð var að það yrði lítið að gera. Stjórn og framkvæmdastjóri voru sammála um það og starfslokin voru í raun að frumkvæði framkvæmdastjóra.“
Ingunn segir skipta mestu í þessari umræðu að ýmsir þættir hafi haft neikvæð áhrif á öflun jarða til endurheimtar votlendis.
„Fjárhagslega hvata hefur skort til landeigenda. Þá höfum við beðið eftir formlegri staðfestingu á áhrifum endurheimtar votlendis á losun gróðurhúsalofttegunda frá íslensku votlendi. Skortur hefur verið á vottun sem og skortur á slagkrafti af hálfu stjórnvalda í málaflokknum.“
Þá segir Ingunn að þau tvö verkefni sem standi fyrir dyrum verði kláruð.
„Nú, ef framkvæmdaleyfi væru fyrir hendi á fleiri jörðum þá myndum við auðvitað ráðast í þau.“
Ingunn segir verkfræðistofuna Eflu halda utan um það verkefni að safna saman íslenskum rannsóknum á áhrif endurheimtar votlendis á losun gróðurhúslofttegunda frá íslensku votlendi í ritrýnda grein.
„Þar með taldar verða nýjar rannsóknir Landgræðslunnar. Vonir standa til að því verkefni verði lokið í haust og að sátt náist um vísindalegu viðmiðin að baki verkefninu.
Þá vonum við að vottunin fáist undir lok árs eins og áætlunin frá Eflu segir, en við þurfum að sjá hvernig gengur og hvort það stenst.“