Fjögur útköll vegna vatnsleka hafa borist slökkviliðinu á höfuðborgarsvæðinu frá því um klukkan hálf eitt í dag. Tveimur þeirra hefur verið sinnt af slökkviliði en hin voru afturkölluð.
Þetta segir varðstjóri slökkviliðsins á höfuðborgarsvæðinu í samtali við mbl.is en ekki er vitað hversu mikið tjón hefur verið vegna lekana.
Töluverður vatnselgur er á götum þar sem niðurföll eru stífluð af snjó. Sveitarfélög á höfuðborgarsvæðinu og Vegagerðin hefur unnið hörðum höndum í dag við að moka frá niðurföllunum, að sögn varðstjóra.