Ógnaði gestum og starfsfólki með hnífi

Rétt fyrir miðnætti barst lögreglu tilkynning um mann á bar í hverfi 108 í Reykjavík sem ógnaði gestum og starfsfólki með hnífi. 

Í dagbók lögreglunnar á höfuðborgarsvæðinu segir að maðurinn hafi verið handtekinn á vettvangi og vistaður í fangageymslu lögreglu. Hann er grunaður um vopnalagabrot, eignarspjöll, hótanir og vörslu fíkniefna.

Þó nokkur erill var hjá lögreglunni í nótt. Meðal annars barst tilkynning um eignarspjöll í Kópavogi rétt eftir klukkan 23.

Þar höfðu nokkrir aðilar skemmt rúður í bifreið með því að berja þær með áhaldi sem vitni sagðist líkjast hafnaboltakylfu.

Kveikt í ísskáp og hjólbörum

Rétt fyrir klukkan 22 barst tilkynning um íkveikju í Grafarvogi þar sem kveikt hafði verið í gömlum ísskáp og hjólbörum. Engin hætta skapaðist af brunanum og engin slasaðist vegna hans.

Um klukkan hálf þrjú barst tilkynning um innbrot í verslun í Kópavogi. Þar hafði gler verið brotið í bílalúgu og sjóðsvél og posatölvu stolið.

Stuttu síðar var aðili handtekinn vegna málsins og hjá honum fannst þýfið úr innbrotinu. Sá var vistaður í fangageymslu lögreglu.

Þá var ökumaður handtekinn í Breiðholti grunaður um akstur undir áhrifum áfengis, en sá gaf öndunarpróf með niðurstöðuna 3,02‰ sem er gríðarlega hátt (rúmlega sexföld refsimörk). Sá var látinn laus að lokinni blóðsýnatöku.

• Blogga um frétt