Stór hópur háskólanema hér á landi býr við fæðuóöryggi, að því er kemur fram í niðurstöðum rannsóknar meðal háskólanema á Íslandi.
Lesa má úr rannsókninni að þeir sem búa við fæðuóöryggi neyta einsleitari fæðu og leita í ódýrari kosti, sem leiðir til þess að fæðan er oftar en ekki næringarsnauð og ekki nægilega fjölbreytt, sem skilar sér í verri heilsu, þreytu og kvíða, að sögn Grétu Jakobsdóttur, lektors við Háskóla Íslands, sem stóð að rannsókninni hér á landi ásamt fleirum.
Fæðuóöryggi er skilgreint sem ótryggur aðgangur að næringarríkum og öruggum mat sem nálgast má á viðunandi hátt.
Fæðuóöryggi getur haft neikvæðar afleiðingar og sýnt sig í slakari námsárangri og vannæringu, sem getur haft skaðleg áhrif á heilsu og líðan. Gréta segir mikilvægt að huga að leiðum til þess að tryggja fæðuöryggi háskólanema.
Úrræðið gæti falist í aukinni fræðslu á grunnþekkingu um mat, næringu og eldamennsku, sem myndi hjálpa einstaklingum að taka hagkvæmari, heilsusamlegri og öruggari ákvarðanir í tengslum við mat.
Nánar er fjallað um málið í Morgunblaðinu í dag.