Bönd níu hinseginfána sem prýddu bæjarskrifstofur Mosfellsbæjar voru skorin í nótt og fánarnir skildir eftir á jörðinni. Þetta staðfestir Regína Ásvaldsdóttir, bæjarstjóri Mosfellsbæjar, í samtali við mbl.is.
„Það voru níu fánar teknir niður fyrir framan bæjarskrifstofuna í nótt. Það var skorið á böndin og fánarnir sjálfir skildir eftir, ég get alveg staðfest það,“ segir Regína sem varð vör við verknaðinn er hún mætti til vinnu í morgun.
Regínu segist þykja miður að skemmdarverkin hafi átt sér stað, en Mosfellsbær hyggst ekki láta neinn bilbug á sér finna og verður fánunum flaggað á ný í dag.
„Við munum flagga aftur og aftur, eins oft og þörf krefur. Við gefumst ekki upp og látum þetta ekki stoppa okkur,“ segir Regína sem telur mikilvægt að sýna hinseginfólki stuðning í verki.
„Mér finnst mjög mikilvægt að styðja við þennan hóp. Það er ákveðið bakslag í baráttunni, þá sérstaklega varðandi trans fólk. Það er pláss fyrir okkur öll í samfélaginu og það er mikilvægt að sveitarfélög sýni stuðning í verki. Það skiptir máli fyrir fólk að sjá flaggað, að sjá regnbogagötur og að upplifa stuðning samfélagsins,“ segir Regína, en í gær var máluð regnbogagata fyrir framan Hlégarð, félagsheimili Mosfellinga.
Málið er komið inn á borð lögreglu og verður rannsakað sem hatursglæpur. Regína segir gífurlega mikilvægt að lögreglan rannsaki málið til hlítar, en borið hefur á fleiri skemmdarverkum á hinseginfánum víðar í Mosfellsbæ.
Regína segir Mosfellsbæ leggja mikið upp úr því að standa vörð um málefni hinseginfólks, þá sérstaklega í gegnum fræðslu.
„Við verðum með hinseginfræðslu í skólum í haust og erum að taka þessi mál mjög föstum tökum. Við teljum að fræðsla og upplýsing skipti mjög miklu máli,“ segir Regína.