Kvikuhlaup er hafið í Sundhnúkagígaröðinni og mælist gosórói þar. Þetta segir Bryndís Ýr Gísladóttir, náttúruvársérfræðingur á Veðurstofu Íslands. Eldgos er því talið geta hafist á næstunni.
Landhelgisgæslan er í eftirlitsflugi yfir svæðinu sem stendur.
Skjálftavirkni við Sundhnúkagígaröðina jókst upp úr klukkan 16.
Rýming hefur verið boðuð umhverfis Grindavík.
Veðurstofan gaf það út í tilkynningu á fimmtudaginn að fyrirvari eldgoss gæti verið minni en 30 mínútur. Kæmi kvikan líklegast upp á svæðinu milli Stóra-Skógfells og Hagafells.
Eins og mbl.is greindi frá í dag hófst skjálftahrina við Kleifarvatn rétt fyrir hádegi og hafa tæplega 100 smáskjálftar mælst þar. Hrinan er líklegast vegna spennubreytinga á Reykjanesskaga.
Fréttin hefur verið uppfærð.