Innlent | mbl | 3.3.2024 | 10:26

Áfram auknar líkur á eldgosi

Frá eldgosinu 8. febrúar. mbl.is/Hörður Kristleifsson

Reikna þarf með að annað kvikuhlaup geti átt sér stað næstu daga og áfram eru auknar líkur á eldgosi líkt og fyrir atburðarrás gærdagsins.

Þetta kemur fram í tilkynningu á vef Veðurstofu Íslands.

Frétt af mbl.is

Líkur á að kvikuhlaupið hafi stöðvast

Skjálftavirkni við Sýlingarfell vegna kvikuhlaups sem hófst um klukkan 16 í gær hjaðnaði jafnt og þétt eftir klukkan 18. Henni var að mestu lokið eftir klukkan 20.

„Gögn benda til þess að kvikuhlaupið í gær hafi stöðvast við Hagafell. Líkur á því að kvika komi upp í tengslum við þetta kvikuhlaup hafa minnkað, en áfram verður náið fylgst með svæðinu hvað þann möguleika varðar,“ segir í tilkynningunni.

Óverulegt magn af kviku sem hljóp

Þá segir að líkanreikningar sýna að magn kviku sem hljóp frá Svartsengi í gær hafi verið óverulegt miðað við fyrri kvikuhlaup sem enduðu með eldgosi. Því er hægt að líta svo á að kvikusöfnun haldi áfram undir Svartsengi líkt og áður.

Línuritið sýnir samanburð á magni af kviku sem safnast hefur undir Svartsengi áður en kvika hleypur yfir í Sundhnúksgígaröðina. Staða kvikusöfnunar 2. mars eftir kvikuhlaupið er merkt með rauðu. Magnið er fengið með líkanreikningum byggt á GPS gögnum og er háð óvissu Kort/mbl.is

„Hversu langt er í næsta kvikuhlaup veltur á því hversu hratt þrýstingur vegna kvikusöfnunar undir Svartsengi byggst upp til að setja það af stað. Merki um nýtt kvikuhlaup væru líkt og áður áköf smáskjálftahrina á svæðinu.“

Veðurstofan vinnur nú að nýju hættumati sem verður uppfært á næstu klukkustundum.

Í tilkynningunni segir að atburðarráðs næstu daga verði líklega með eftirfarandi hætti:

Kvikumagn undir Svartsengi heldur áfram að aukast sem gæti endað með nýju kvikuhlaupi og jafnvel eldgosi.
Eldgos gæti hafist með mjög stuttum fyrirvara, jafnvel innan við 30 mínútur.
Líklegast er að gos komi upp á svæðinu milli Stóra-Skógfells og Hagafells